Psa 14 | NOP | STEP | Me nadinadihinit mokit kaulehi, adi nehi welehik gineŋ indiŋ yoiŋ, “Bepaŋ nemu hatilak.” Me undihi adi me hogohi. Adi yadi titiŋhik madimadikeŋgoŋ tiiŋ. Nebek niŋdi titiŋ momooŋ nemu tilak.

Psalms 14

Bepaŋdi kunum foloŋ hali metam sigilulum timiŋa kadakaniŋ tiiŋ u hayabulak

1 Me nadinadihinit mokit kaulehi, adi nehi welehik gineŋ indiŋ yoiŋ, “Bepaŋ nemu hatilak.” Me undihi adi me hogohi. Adi yadi titiŋhik madimadikeŋgoŋ tiiŋ. Nebek niŋdi titiŋ momooŋ nemu tilak.

2 Yahwe adi kunum foloŋ hali diweune foune metam nadinadi fuliŋgoŋhinit ne’walaŋkade nenobu baneŋ, unduŋ yoŋa yabunadi tilak. 3 Iŋgoŋ mokoŋ. Metam hogohogok wanakaŋ talik fofooŋ u bikabudapmaŋ tiiŋ. Adi’walaaniŋ kubugoŋ-kabe niŋdi titiŋ didimeniŋ-kabe nemu tilak. Mokoŋ hinek. Adi hogohogok kadakaniŋ gineŋ fodapmaaŋ me kadakahi hogok mintadapmaiŋ.

4 Yahwedi indiŋ yolak, “Me kadakaniŋ tiiŋ heki yoŋ adi nadinadihinit mokit bidak? Adi yadi metamneye nadibedinit mokit hogok yehitubu-kadakafit tiiŋ. Tiŋa naninadi-kabe nemu tiiŋ.”

5 Unduŋ doktiŋa Bepaŋdi metam nediyeŋ medeŋiŋ takaliiŋ heki adigut halaak, kaŋ me heki u munta kisaŋ hinek tineeŋ.

6 Me hogohi, hidi me fofoŋhinitdi nemek kedem tinene nadihebet tiiŋ kaŋ tubufiit tiyemiŋa yehitubu-gweheye tine tiiŋ. Iŋgoŋ oŋ, Yahwedi yabu-ulidoko tilak.

7 Nu adi indiŋ hinek nadilat. Yahwedi Saiyonniŋ me niŋ kameune buŋa Isilaehi metam kotigoŋ yanagilaak. Bepaŋdi metamŋiye yehitubu-lodaaŋ kotigoŋ yanagilune momooŋ hatineeŋ. Biyagoŋ hinek, Jekop’walaŋ yalakiŋiye adi welemomooŋ nadineeŋ.